ఉదాత్త సాహిత్యంతో సృష్టించిన సినీ గీతాలంటే ఎంతో అభిమానం, ఇంకా ఇంగ్లీష్ లో చెప్పాలంటే “PASSION ” ఉన్న ప్రముఖ గాయని శ్రీమతి శారద ఆకునూరి. శ్రీ మృత్యుం జయరావు, శ్రీమతి రమాదేవి దంపతులకు తూర్పు గోదావరి జిల్లా కాకినాడలో జన్మించిన శారద ఆకునూరి , గుంటూరు జిల్లా బాపట్ల లో మరియు చిత్తూరు జిల్లా తిరుపతిలోనూ విద్యనభ్యసించారు. మూడేళ్ళ లేలేత ప్రాయం లోనే పాటలు పాడటం అభ్యసించిన వీరు భక్తి లలిత, సినిమా పాటల పోటిలలో అనేక మార్లు రాష్ట్రస్థాయి బహుమతులను గెలుచుకున్నారు. వ్యాసరచన మరియు నృత్య పోటీల్లో పాల్గొని పలువురి ప్రముఖుల ప్రశంసలందు కొన్నారు. ఆకాశవాణి విజయవాడ కేంద్రం లో యువవాణి కార్యక్రమం లో లలిత గీతాలు ఆలపించి అతికొద్ది కాలంలోనే రేడియో ఆడిషన్ లో కృతార్ధురాలై రేడియో గాయని గా అనేక లలిత గీతాలు ఆలపించారు. ఇవేకాక స్నేహం, అక్షరాస్యత మీద అనేక యువవాణి రేడియో నాటికలలో ప్రధాన పాత్ర పోషించారు. తన గాత్రం తో ఆకాశవాణి శ్రోతలతో పాటు టీవి ప్రేక్షకులను కూడా ఈ టీవి వారి సరిగమలు సినిమా పాటలు, సినిమాల క్విజ్ లో ప్రథమస్థానం, జెమినీ టీవి వారి నవరగంలో పాల్గొని అలరించారు. హైదరాబాద్ దూరదర్శన్ లో టెలీ స్కూల్ కార్యక్రమాలు, మహిళా కార్యక్రమాల తో పాటు పలు సినీ ప్రముఖులు, జగపతిబాబు, KM రాధాకృష్ణన్, రాజా, కోటి గారు వంటి వారిని, ప్రముఖ పారిశ్రామిక వేత్తలను ఇంటర్వ్యూ చేసి తన ప్రశ్నావళి ద్వారా ప్రముఖుల అంతరంగాలను అద్భుతంగా ఆవిష్కరించారు. సిటీ కేబుల్ న్యూస్ రీడర్ గా, గేమ్ షో హోస్ట్ గా, యాంకర్ గా ప్రేక్షకాభిమానాన్ని పొందారు.